पुणे : चतुरंग प्रतिष्ठानतर्फे दिला जाणारा यंदाचा जीवनगौरव पुरस्कार शिक्षण क्षेत्रात महत्त्वाची कामगिरी बजावणाऱ्या डॉ. गो. बं. देगलूरकर यांना जाहीर झाला. तीन लाख रुपये, सन्मानचिन्ह आणि मानपत्र असे या पुरस्काराचे स्वरूप आहे.
चतुरंग प्रतिष्ठानच्या डिसेंबर महिन्यात होणाऱ्या ‘रंगसंमेलन २०१७’मध्ये डॉ. देगलूरकर यांना हा पुरस्कार प्रदान केला जाईल. जीवनगौरव पुरस्काराचे यंदाचे २७ वे वर्ष आहे. डॉ. विनय सहस्रबुद्धे यांच्या अध्यक्षतेखालील निवड समितीने डॉ. देगलूरकर यांची निवड केली. या समितीत विजय कुवळेकर, डॉ. सर्जेराव ठोंबरे, डॉ. कविता रेगे, अचला जोशी, डॉ. सागर देशपांडे आणि डॉ. शुभदा जोशी यांचा सहभाग होता.
मूर्तीशास्त्र आणि मंदिर स्थापत्यशास्त्र या आगळ्या वेगळ्या विषयात डॉ. देगलूरकर यांनी राष्ट्रीय आणि आंतरराष्ट्रीय स्तरावर पायाभूत कार्य केले आहे. डेक्कन कॉलेज अभिमत विद्यापीठाचे कुलपती या नात्याने शैक्षणिक प्रशासनातील कुशलता आणि कार्यक्षमता राखत अनेक तरुण अभ्यासक घडवण्याचे मोलाचे कार्य त्यांनी केले आहे. संस्कारभारती, महाराष्ट्र ग्रंथोत्तेजक सभा आदी संस्थांच्या वाटचालीत त्यांचे मोलाचे योगदान आहे.
डॉ. देगलूरकर यांच्या या अव्याहत कार्याची दखल घेऊन निवड समितीने या पुरस्कारासाठी त्यांची एकमताने निवड केली आहे.
